ಪಾಕ್ ಪ್ರಧಾನಿ ಇಮ್ರಾನ್ ಖಾನ್ ಸರ್ಕಾರ ಪತನಕ್ಕೆ ಕ್ಷಣಗಣನೆ : ವಿಶ್ವಾಸ ಮತ ಯಾಚನೆ | Janata news

ಇಸ್ಲಾಮಾಬಾದ್ : ನೆರೆರಾಷ್ಟ್ರ ಪಾಕಿಸ್ಥಾನದ ಪ್ರಧಾನಿ ಇಮ್ರಾನ್ ಖಾನ್ ಸರ್ಕಾರ ಸಂಕಷ್ಟ ಎದುರಿಸುತ್ತಿದ್ದು, ಸರ್ಕಾರ ಅಳಿವು ಉಳಿವಿನ ಕುರಿತು ಮಾಹಿತಿ ಹೊರಬಿಳಲು ಕೌಂಟ್-ಡೌನ್ ಈಗಾಗಲೇ ಶುರುವಾಗಿದೆ.

ನಿನ್ನೆ ಬುಧವಾರ ನಡೆದ ಚುನಾವಣೆಯಲ್ಲಿ ಸರ್ಕಾರದ ಹಣಕಾಸು ಸಚಿವರು ಸೆನೆಟ್ ಸ್ಥಾನ ಕಳೆದುಕೊಂಡ ಬೆನ್ನಲ್ಲೇ, ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ಸಂಸತ್ತಿನಲ್ಲಿ ವಿಶ್ವಾಸ ಮತ ಚಲಾಯಿಸಲಿದ್ದಾರೆ, ಎಂದು ವಿದೇಶಾಂಗ ಸಚಿವರು ತಿಳಿಸಿದ್ದಾರೆ.

ಸದಾ ಭಾರತದ ರಾಜಕೀಯ ಬೆಳವಣಿಗೆ ಕುರಿತು ಆಸಕ್ತಿ ವಹಿಸಿದ್ದ ಇಮ್ರಾನ್ ಖಾನ್ ಕುರ್ಚಿ ಅಲುಗಾಡುತ್ತಿದ್ದು, ಸಧ್ಯಕ್ಕೆ ಪಾಕಿಸ್ತಾನದಲ್ಲಿ ರಾಜಕೀಯ ಬೆಳವಣಿಗೆ ಗರಿಗೆದರಿದೆ. ವಿಪಕ್ಷ ಬೆಂಬಲಿತ ಮಾಜಿ ಪ್ರಧಾನಿ ಯೂಸುಫ್ ರಝಾ ಗಿಲಾನಿ ವಿರುದ್ಧ ಹಣಕಾಸು ಸಚಿವ ಅಬ್ದುಲ್ ಹಫೀಜ್ ಶೇಖ್ ಸೆನೆಟ್ ಸ್ಥಾನಕ್ಕಾಗಿ ನಡೆದ ಚುನಾವಣೆಯಲ್ಲಿ ಜಯ ಗಳಿಸಿದ ನಂತರ, ಇಮ್ರಾನ್ ಖಾನ್ ಸರ್ಕಾರಕ್ಕೆ ದೇಶದ ಸೆನೆಟ್ ನಲ್ಲಿ ಅಚ್ಚರಿಯ ಬಹುಮತದ ನಷ್ಟವನ್ನು ಎದುರಿಸಬೇಕಾಯಿತು.

ಸೆನೆಟ್ ಸ್ಥಾನಕ್ಕಾಗಿ, ರಾಷ್ಟ್ರೀಯ ಅಸೆಂಬ್ಲಿಗೆ ನೇರವಾಗಿ ಚುನಾಯಿತ ಸದಸ್ಯರು ಮತ ಚಲಾಯಿಸುತ್ತಾರೆ. ಮತ್ತು ಶೇಖ್ ಅವರ ಸೋಲಿನ ಹೊರತಾಗಿಯೂ, ತಾವು ಇನ್ನೂ ಬಹುಮತವನ್ನು ಹೊಂದಿದ್ದಾರೆಂದು ತೋರಿಸಲು ಖಾನ್ ವಿಶ್ವಾಸ ಮತ ಚಲಾಯಿಸುತ್ತಿದ್ದಾರೆ, ಎಂದು ವಿದೇಶಾಂಗ ಸಚಿವ ಶಾ ಮಹಮೂದ್ ಖುರೇಷಿ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.

ಇಂದಿನ ಮಹತ್ವದ ಬೆಳವಣಿಗೆಯೊಂದರಲ್ಲಿ, ಇಮ್ರಾನ್ ಖಾನ್ ಪಾಕಿಸ್ತಾನ ಸೇನಾ ಮುಖ್ಯಸ್ಥ ಮತ್ತು ಐಎಸ್ಐ ಮುಖ್ಯಸ್ಥರೊಂದಿಗಿನ ಸಭೆಯನ್ನು ನಡೆಸಿ ಕೆಲವೇ ಗಂಟೆಗಳ ಮೊದಲು ಮುಕ್ತಾಯಗೊಳಿಸಿದ್ದಾರೆ. ಮೂಲಗಳ ಪ್ರಕಾರ, ಸಂಸತ್ತಿನಲ್ಲಿ ವಿಶ್ವಾಸ ಮತ ಚಲಾಯಿಸುವ ಘೋಷಣೆ ಬೆನ್ನಲ್ಲೇ, ಪ್ರಧಾನಿ ಸ್ಥಾನದ ಉಳುವಿಗಾಗಿ ಖಾನ್ ನಡೆಸಿದ ಕಸರತ್ತು ಎಂದು ಈ ಸಭೆಯನ್ನು ವಿಶ್ಲೇಷಿಸಲಾಗಿದೆ.

ಪಾಕಿಸ್ತಾನದ ಸ್ಥಳೀಯ ಸಮಯ ಸಂಜೆ 7:30 ಸುಮಾರು ಇಮ್ರಾನ್ ಖಾನ್ ರಾಷ್ಟ್ರವನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ, ಎನ್ನಲಾಗಿದ್ದು, ಬಹುಶಃ ಶನಿವಾರ ಸಂಸತ್ತಿನಲ್ಲಿ ವಿಶ್ವಾಸ ಮತ ಯಾಚಿಸುವ ಸಾದ್ಯತೆಗಳಿವೆ.